[midost2014]

باختصار الفرق بين الهارد SSD و HDD

كتير من الناس بيحتاروا: أجيب SSD ولا HDD؟
افهم الفرق بينهم الاول وحتقرر بعدها تجيب أنهى هارد

*** أولًا: الهارد HDD (الهارد التقليدي)
ده الهارد اللي متعودين عليه من زمان، بيشتغل
بأقراص دائرية بتلف وسن إبرة بيقرأ البيانات.

مميزاته:
- أرخص في السعر
- بييجي بمساحات كبيرة (1 تيرا، 2 تيرا وأكتر)
- مناسب لتخزين ملفات كتير زي الصور والأفلام
والنسخ الاحتياطية

عيوبه:
- بطيء جدًا في التشغيل ونقل البيانات
- بيعمل صوت واهتزاز لأنه ميكانيكي
- بيتأثر بسهولة من الخبطات أو السقوط
- بيستهلك كهربا أكتر
----------------------------------------------------------
*** ثانيًا: الهارد SSD (الهارد الحديث السريع)
ده بيستخدم شرائح إلكترونية زي الفلاشة،
ومفيهوش أجزاء متحركة.

مميزاته:
- أسرع بكتير جدًا من HDD (تشغيل الويندوز في ثواني )
- هادي تمامًا، مفيهوش صوت
- أكثر تحملًا للصدمات
- موفر في الطاقة
- بيخلي اللابتوب/الكمبيوتر أسرع بشكل عام

عيوبه:
- أغلى فى السعر من الهارد العادي بنفس المساحة
- المساحات الكبيرة منه بتكلف أكتر
- عدد مرات الكتابة ليه محدود
(لكن ده مش هيأثر في الاستخدام الطبيعي)
----------------------------------------------------------
*** طيب... إيه الأفضل؟
لو انت بتدور على السرعة والأداء (تشغيل سريع – تحميل
أسرع – تنقل بين البرامج بسلاسة)،
يبقى SSD هو الأفضل بدون نقاش

لو محتاج مساحة كبيرة وسعر مناسب لتخزين أفلام
وألعاب وتقارير، يبقى HDD هينفعك أكتر

ولو تقدر، يبقى الدمج بينهم هو الحل الأمثل:
(1) SSD للويندوز والبرامج اختار مثلا هارد مساحته 128 جيجا
(2) HDD للتخزين (الملفات والأفلام والالعاب ....الخ)
----------------------------------------------------------
نصيحة أخيرة:
لو جهازك فيه هارد HDD وحاسس إنه بطئ جدًا...
فكّر جدياً تركب هارد SSD وهتشوف فرق في السرعة
يخليك تحس إنك جبت جهاز جديد
----------------------------------------------------------

تحياتى للجميع أخوكم فى الله

[رضا سات]

الله ينور ى هندسه

[zoro1]

كل الشكر والتقدير لك اخى الكريم للجهد الطيب وللموضوعات المميزة
وجزاك الله كل خير اخى الكريم
وتقبل مرورى يا غالى
............... ..

[محمود الاسكندرانى]

بارك الله فيك ياغالى

[A H M E D B A S H A]

الله ينور عليك ومعلومة جميلة جدا

[محمد كوماندو]

الله ينور عليك يا أستاذ محمد
مجهود يستحق التقدير
استمر